Հանձնել արյուն

#ishareblood

Ով կարող է հանձնել արյուն

18 տարին լրացած, առնվազն 53 կգ` իգական սեռի ներկայացուցիչների դեպքում եւ 63 կգ` արական սեռի ներկայացուցիչների դեպքում։

Արյան ճնշումը չպետք է լինի շատ բարձր կամ ցածր /որոշում է բժիշկը/ առավելագույնը` 90 դիաստոլիկ, նվազագույնը`60, առավելագույնը` 140 սիստոլիկ, նվազագույնը` 90, զարկերակը լինի 60-90 հարված րոպեում։

Կան հակացուցումներ

Արյունատվության հակացուցումները կարող են լինել` բացարձակ, երբ մարդը երբեւէ չի կարող հանձնել արյուն, ժամանակավոր, երբ մարդը որոշ ժամանակ անց կարող է դառնալ դոնոր:

Բացարձակ հակացուցումներ

Վարակիչ հիվանդությունները (ՄԻԱՎ-վարակակրություն, վիրուսային հեպատիտներ, երբեւէ լաբորատոր դրական պատասխան վիրուսային հեպատիտների նկատմամբ, սիֆիլիսի, բնածին կամ ձեռքբերովի, տուբերկուլյոզի բոլոր ձեւերը, բրուցելյոզ եւ այլն)

Սիրտ-անոթային, նյարդային, շնչառական, մարսողական համակարգերի մի շարք հիվանդությունները, չարորակ նորագոյացությունները, արյան հիվանդությունները եւ այլն:

Բացի մշտական հակացուցումներից, արյունատվության բացառման համար հիմք են հանդիսանում նաեւ հետեւյալ ռիսկային խմբերին պատկանող անձինք` նույնասեռականները, մարմնավաճառները, կալանավայրերում գտնվող անձինք, վիրուսային հեպատիտներով հիվանդների եւ վարակակիրների, ՁԻԱՀ-ով հիվանդների եւ ՄԻԱՎ-վարակակիրների ընտանիքի անդամներ:

Դոնորությունը բացառող ժամանակավոր հակացուցումներ

1) Արյան բաղադրամասերի փոխներարկում, դաջվածք, մաշկի կամ լորձաթաղանթների ամբողջականության խախտումով ուղեկցվող բժշկական գործիքային միջամտություններ /6 ամիս/

2) Վիրահատություններ, այդ թվում նաեւ՝ հղիության արհեստական ընդհատում /6 ամիս/

3) Հայաստանի Հանրապետությունից դուրս երկարատեւ (1 ամսից ավելի) գործուղում (վարակների էնդեմիկ օջախներում) /6 ամիս/

4) Հղիության եւ լակտացիայի շրջան ոչ պակաս, քան 1 տարի ծննդաբերությունից հետո, ոչ պակաս, քան 3 ամիս լակտացիայի ավարտից հետո

5) Դաշտանի շրջան /դաշտանի ավարտից հետո ոչ պակաս, քան 5 օր/

6) Ալերգիկ վիճակներ /2 ամիս/

7) 37 ˚C ջերմաստիճանից բարձր ջերմություն, վերին շնչառական ուղիների սուր բորբոքումներ /1 ամիս/

8)Պատվաստումներ`

կենդանի վակցինա /1ամիս/

սպանված վակցինա /10 օր/

կատաղության դեմ /2 շաբաթ/

հեպատիտ Բ-ի դեմ /6 ամիս/

9) Դեղերի օգտագործում` հակաբիոտիկներ, սալիցիլատներ եւ ոչ ստերոիդ հակաբորբոքային միջոցներ /1 շաբաթից մինչեւ 1 ամիս/

10) Մալարիայի էնդեմիկ վայրերից վերադարձած անձինք /5 տարի/

11) Ոգելից խմիչքների ընդունում /24 ժամ/

12) Ալանինամինատրանսֆերազայի բարձրացում մինչեւ 2 անգամ /3 ամիս/

Ինչպես նախապատրաստվել արյունատվության

Եթե կա համապատասխանություն տվյալ պայմաններին, ապա արյունատվության օրը չպետք է օգտագործել յուղոտ, տապակած, կծու, ապխտած կերակուր, կարելի է ընդունել միայն թեյ կամ սուրճ իսկ արյունատվությունից 24 ժամ առաջ չպետք է օգտագործել ոգելից խմիչքներ։

Նախապես ընտրված արյան կետը պետք է ներկայանալ անձնագրով եւ/կամ զինվորական գրքույկով/:

Դոնորը լրացնում է հարցաթերթիկը, որում նշում է իր առողջական վիճակի եւ ապրելակերպի մասին, որից հետո անցնում է լաբորատոր հետազոտություն եւ զննվում է թերապեւտի կողմից: Արյունատվության գործընթացն իրականացվում է միանվագ ստերիլ պարագաներով: Արյունատվությունն իրականացվում է ժամը 9.00-13.00-ը ամեն օր, բացի հանգստյան եւ տոնական օրերից: Ցանկալի է չնախատեսել արյունատվություն քննություններից, մրցումներից եւ այլ ինտենսիվ աշխատանքներից առաջ: